🎥 Историски инфраструктурен инвестициски бран: 14 милијарди денари за 828 проекти во сите општини

Нови патишта, модерни училишта, градинки, нови паркови – Потпишани 828 проекти од вториот владин повик за инвестиции во општини. Ова значи дека  на локално ниво ќе се инвестираат 225 милиони евра , најмногу во ресорот транспорт или 132 милиони евра..  Премиерот Мицкоски изразува задоволство што градоначалниците без разлика на  политичка припадност се посветени на реализација на проекти кои се од огромно значење за полесен живот на граѓаните

-Ова е најголемата инвестициска офанзива за општините некогаш направена. Не само по бројките туку и по одлучноста и правичноста. Се гради во цела држава во сите општини што аплицираа и има подготвена документација, без партиски филтри, без фаворизирање. Онаму каде што има проект, таму има и поддршка, изјави Христијан Мицкоски, претседател на Влада.

Инвестицискиот циклус кој се поттикнува со проектите кои долго време стоеле во фиока ќе придонесе за раст на економијата. Со двата повика вкупно се финансираат 1116 проекти, што е најголемата инвестиска офанзива во општините досега.

Од Владата се задоволни од динамиката на реализација на проектите од првиот повик. Завршени се 40 отсто од проектите, или 113 проекти . Од владата очекуваат дека до крајот на годината ќе има и значително зголемување на финансиската реализација која во моментов изнесува над 800 милиони денари.