Македонија влегува во нов инвестициски циклус во патната инфраструктура. Се модернизираат патиштата во источниот дел на државата.
Неделава ќе биде објавен тендер за изградба на експресниот пат Радовиш – Струмица, најави премиерот Христијан Мицкоски. Тој истакна дека проектот предвидува проширување и модернизација на постојната сообраќајница, која во иднина треба да обезбеди побрза врска кон граничниот премин со Бугарија.
Паралелно со оваа делница, објавен е и тендер за изградба на експресниот пат Кочани – Виница – Делчево.
Во последните две години во локалната и регионалната инфраструктура се вложени повеќе од 350 милиони евра. Инвестирани се над 25 милиони евра за обнова на 96 улици во 72 општини, а реконструирани се повеќе од 72 километри локална патна мрежа.
Паралелно се работи и на еден од најзначајните инфраструктурни проекти во земјава – автопатот Кичево – Охрид. За негово комплетирање се обезбедени дополнителни 175 милиони евра, а според најавите на Владата, целата делница треба да биде пуштена во употреба во првиот квартал од 2027 година.
Во полн ек е и изградбата на автопатските делници од Коридорите 8 и 10-д. Станува збор за капитални проекти кои треба да ја подобрат поврзаноста на државата, да го забрзаат транспортот и да отворат нови можности за економски развој.
