Интензивирани се градежни активности на железничкиот Коридор 8 во делот помеѓу Бељаковце (Куманово) до Крива Паланка. Ја градиме Македонија – објави на „Фејсбук“ вицепремиерот и министер за транспорт, Александар Николоски.
И директорот на МЖ „Инфраструктура“, Синиша Ивановски, на својот фејсбук-профил напиша дека има засилени градежни активности на изградбата на пругата кон Бугарија, делница од Бељаковце кон Крива Паланка.
– Оваа делница е во должина од 34 километри. Во моментот засилено се гради најдолгиот мост број 7, во должина од 194 метри, еден од трите неизградени од вкупно 29 – вели Ивановски.
Како што информира Ивановски, парелелно се произведуваат бетонските елементи потребни за санација на 26-те полуизградени моста од 90-тите.
– Вкупно треба да се произведат 352 бетонски елементи, а до моментот се произведени 71, со динамика од 10 неделно – дополни директорот.
Според него, вкупен прогрес на проектот е околу 40 отсто, а проекцијата до крајот на оваа година е да се стигне до 50 проценти реализација.
– Продолжуваме со засилено темпо до конечна реализација на овој капитален инфраструктурен проект – нагласува Ивановски.
Видеото може да го погледнете на следниот линк:
