Во КСП Центар-Јадро вечер во 19 часот ќе биде отворена групната изложба „Да се мисли со материјата: Четири лекции од водата и земјата“, во рамки на меѓународниот проект „Семиња на солидарноста – Уметнички практики и екофеминистички сојузи за грижлива иднина“.
На изложбата ќе бидат претставени уметничко-истражувачките практики на Валбона Фејза, Христина Крстеска, Ивана Самандова и Викторија Попоска. Поставката е курирана од Јованка Попова и организирана од Проектен простор „Прес ту егзит“, а за посетителите ќе биде отворена до 14 септември.
Како што информираат организаторите, изложбата ги истражува односите меѓу човекот и природата преку конкретни места, материјали, локални истории и знаења, со акцент на меѓузависностите што ги поврзуваат луѓето со природната средина.
Насловот „Да се мисли со материјата“ упатува на поинакво разбирање на материјата, не само како ресурс или предмет на уметничко истражување, туку и како носител на сопствени истории и сведоштва за промените во животната средина и последиците од човековото дејствување.
Преку теренска работа, документација, разговори и непосредна работа со различни материјали, авторките отвораат прашања поврзани со исчезнувањето на локалните знаења и практики, екстракцијата на природните ресурси, загадувањето и прекумерната потрошувачка.
Изложбата е дел од програмата „Училиште за грижливи иднини во Скопје“, што ќе се одржува од 10 до 12 септември. Настанот ја означува првата фаза од повеќегодишниот меѓународен проект „Семиња на солидарноста – Уметнички практики и екофеминистички сојузи за грижлива иднина“, реализиран во соработка со партнери од Австрија, Косово и Србија.
