Железничката станица во Скопје ќе го фати последниот воз. По децении запуштеност, таа почна да се чисти и да се подготвува за реконструкција. Граѓаните со нетрпение очекуваат повторно да можат да се возат со воз , удобно да патуваат и навремено и брзо да стигнат до саканата дестинација. Пример велешанец кој работи во Скопје би можел секој ден да патува со воз ако има редовни линии, точен возен ред, пристојни вагони и лесно купување билети. Така би потрошил и помалку пари за превоз. Токму затоа очекувањата на граѓаните се дека работите ќе почнат конечно да се менуваат. Патувањето со воз би било прва опција за голем дел од скопјани во иднина.
„Не се возам со воз, но ако имам можност би се возел. Би сакал да работи железничкиот сообраќај, многу долго трае времето додека се возам, но ако се подобри поефтино е и побрзо.“- велат граѓаните.
Надлежните започнаа со чистење и уредување на Железничката станица во Скопје, со планови за долгорочна реконструкција. Се проверува и безбедноста на објектот. Отстранувањето на билборди, плакати и реклами, како и генералното чистење беа првичните активности кои се превземаа за постигнување на оваа цел. Планот за реконструкција се изготвува во соработка на Архитектонскиот факултет, а треба да се зачува основниот изглед кој што е направен по проектот на Кензо Танге, но со нови и модерни елементи и материјали.
