Повисоки плати во јавното здравство, нови вработувања, спојување на клиниките во еден Клинички центар,нова опрема, реконструкции на болници и оддели, проширување на позитивната листа на лекови – ова се дел од плановите на министерот за здравство Таравари за новата 2025 година.Тој на брифингот со новинарите, кажа дека во катастрофална состојба се хируршките сали во „8 Септември“ и во болницата во Тетово, па затоа најави реновирање на истите. За крајот на јуни најави и завршување на изградбата на катните гаражи на Клинички.
“Што можеме ние како Влада да направиме, да подобриме услуги и плати, тоа континуирнао го правиме. Не случајно, често специјализанти, потоа нов колективен договор. Ќе видиме сега за идната година и бодовите односно капитацијата за докторите по семејна медицина, некаде во април да се покачат за да бидат мотивирачки, тие да останат да работат и да дадат нивен максимум како здравствени работници. Тоа можеме како МЗ и како Влада. Друго не зависи од нас”, истакна Таравари.
Таравари најави сериозна стратегија за мотивација кај младите лекари да одберат специјализации кои се потребни..меѓудругото, се пофали дека преговара со неколку доктори кои работат во европски држави, и биле заинтересирани да се вратат во државата.
“Јас мислам дека ова е доста мотивирачки за нас. Можеби бројката е симболична, тројца. Мислам дека сериозно ќе треба како МЗ и како Влада да размислиме да ги отвориме вратите, барем тие што се поблиску од Хрватска или од Словенија и од другите европски држави. Доколку имаат, на пример, тригодишно работно исксутво во тие држави, си заминале, да бидат отворени вратите во сопствената држава, да се вратат и да ги интегрираме во нашиот здравствен систем”, рече министерот.
Министерот изрази оптимизам дека идната година ќе завршат реконструкциите на болниците во Штип и во Кичево.Но и дека конечно Клиничкиот центар на почетокот на новата година ќе добиде нова компресорска станица.
Таравари здравствениот систем за 2024 го оцени од 5 до 10 со бројот 8. И порача дека во новата 2025 ќе го даде максимумот за граѓаните да добијат добра здравствена услуга а вработените во системот да добијат подобри услови за работа и повисоки плати.
