Голем интерес за деветвалентната вакцина против хуман папилома вирус (ХПВ) е забележан и кај момчињата – новина што беше воведена во 2024 година. Од друга страна, загрижувачки е нискиот опфат со МРП (морбили, рубеола, заушки) вакцината, особено во скопските општини Аеродром, Карпош и Центар, каде што покриеноста е под 60-70 проценти. Ова создава висок ризик од нова епидемија со морбили.
Овие информации беа споделени денеска од националната координаторка за имунизација, Александра Грозданова, на одбележувањето на Европската недела на имунизација во Скопје.
„Ниеден родител не треба да се соочи со болести како пертусис и морбили, кои повторно се појавуваат поради нискиот опфат со вакцини,“ изјави Грозданова. Таа посочи дека родителите треба да се информираат од здравствени работници и да се потпрат на проверени информации, а не на дезинформации што кружат на социјалните мрежи.
Според неа, иако постојат општини во внатрешноста и некои скопски населби со над 90% покриеност, урбаните подрачја со низок опфат ја зголемуваат опасноста од ширење на заразни болести.
Претставничката на УНИЦЕФ во Македонија, Лесли Милер, истакна дека вакцините се еден од најголемите успеси на човештвото. „Мора да одржуваме ниво на имунизација над 90-95% за да се постигне колективен имунитет и да ги заштитиме сите деца, особено оние кои не можат да се вакцинираат,“ рече таа.
Националната покриеност со МРП вакцина во 2024 година е само 72,7%, што претставува пад во однос на 73,4% во 2023 година.
Милер укажа и на недоволната покриеност со ХПВ вакцина – само половина од 14-годишните девојчиња во државата се целосно вакцинирани. Таа повика на зголемување на опфатот и кај девојчињата и кај момчињата, бидејќи вакцината спречува до 90% од случаите на рак на грлото на матката и други заболувања предизвикани од ХПВ.
Претставникот на Светската здравствена организација, Аким Али, рече дека по пандемијата со Ковид-19 се појавија сомнежи кај дел од јавноста, но дека потребата од вакцинација останува критична. „Ова не е време за повлекување. Вакцинацијата спасува животи,“ истакна тој.
Министерот за здравство, Арбен Таравари, рече дека мотото годинава е „Имунизација – придобивка за сите“, при што Министерството обезбедило 385 милиони денари за вакцини. Со поддршка на СЗО, формирани се 35 теренски тимови за вакцинација кои работат во 18 општини, директно информирајќи ги граѓаните.
Директорот на Здравствен дом – Скопје, Самир Исени, информираше дека во рамките на Неделата на имунизација ќе се спроведе теренска вакцинација на деца кои ги пропуштиле потребните дози, во 39 населени места низ Скопје и околината. Централниот настан е закажан за сабота, кога ќе се делат флаери и ќе се даваат совети во врска со важноста на имунизацијата.
