По повеќегодишни барања од жителите на Горно Оризари, почна реализацијата на повеќе инфраструктурни проекти со кои се подобруваат условите за живеење во оваа населба.
Од Град Скопје информираат дека улицата кон Горно Оризари, која со години беше во лоша состојба, се реконструира со поставување речиси 4.000 квадратни метри нов асфалт. Со реконструкцијата се очекува да се подобрат пристапот до населбата и безбедноста на жителите, учениците и на сите учесници во сообраќајот.
– Покрај реконструкцијата на улицата, во населбата се поставува ново детско катче, а се врши и целосна реконструкција на спортскиот терен, со цел децата и младите да добијат уреден простор за игра, спорт и дружење. Во рамките на активностите е уредена и нова автобуска постојка во согласност со барањата на жителите – велат од Град Скопје.
На терен денеска биле присутни министерот Ерџан Демир, градоначалникот на град Скопје, Орце Ѓорѓиевски, градоначалникот на Шуто Оризари, Курто Дудуш, и претставници на локалната заедница.
– Овие луѓе не бараа чуда. Бараа нормални услови за живеење. Денес сме тука со конкретни реализирани активности – реконструирана улица, ново детско катче, уреден спортски терен и автобуска постојка. Ова е само почеток. Во Горно Оризари имаме уште работа и ќе продолжиме да ги слушаме потребите на жителите и да работиме на нивно решавање – порачал Ѓорѓиевски при денешната посета.
Проектите се дел од активностите насочени кон подобрување на инфраструктурата и јавните простори во скопските населби.
