Родовиот паритет во политичкиот живот не е прашање што се однесува само на жените. Тоа е прашање кое го одредува квалитетот, легитимноста и репрезентативноста на секоја демократска институција. Парламент во кој недостасува гласот на половина од населението е парламент кој не ги слуша во целост потребите и приоритетите на своите граѓани, порача претседателот на Собранието Африм Гаши на денешната тркалезна маса „Унапредување на родовиот паритет и борба против дигиталното насилство врз жените во политиката во Македонија“,.
Според Гаши, во текот на изминатите децении, Собранието постигнало забележителен напредок во однос на застапеноста на жените
– Ова е резултат на законски реформи, но и на постојаната работа на телата на Собранието посветени на родовата еднаквост, вклучувајќи ја Комисијата за еднакви можности на жените и мажите и Клубот на пратенички. Сепак, бројките сами по себе не се доволни. Свесни сме дека политичкото учество на жените денес се соочува со нов, сериозен предизвик, а тоа е дигиталното насилство и дезинформациите насочени кон жените во политиката. Овој феномен ги обесхрабрува жените да влезат во политиката, ги напаѓа оние кои веќе се дел од неа, и на долг рок го загрозува плурализмот на нашата демократија. Затоа е неопходно овој проблем да се третира со истата сериозност со која се третира секое друго прашање на институционална безбедност и владеење на правото, истакна Гаши.
Тркалезната маса во следните два дена ќе биде можност да се разговара за меѓународните и регионалните рамки за паритет, стереотипите и општествените норми кои го попречуваат политичкото учество на жените и за начините на кои институциите вклучително и самото Собрание, можат подобро да одговорат на сексизмот, вознемирувањето и насилството врз жените во политиката.
– Овој дијалог не треба да се сфати како критика упатена кон која било конкретна институција или политичка опција. Напротив, ова е покана за заедничка рефлексија и заедничка одговорност. Предизвиците за кои денес зборуваме ги надминуваат партиските граници, и токму затоа решенијата мора да се бараат заеднички, со отвореност, со факти и со почит кон различните гледишта. Собранието на Македонија, како законодавен дом на сите граѓани, ја препознава својата двојна одговорност во овој процес. Од една страна, ние сме институцијата која донесува закони и ги надгледува политиките на извршната власт во областа на родовата еднаквост. Од друга страна, ние самите сме работно место и јавен простор во кој мора да важат највисоките стандарди на почит и достоинство, за пратеничките, за вработените во Собраниската служба и за секој граѓанин кој доаѓа во контакт со оваа институција, подвлече Гаши.
Нагласувајќи дека парламентите со поголемо и посуштинско учество на жените произведуваат позасновани, поинклузивни и поодржливи законски решенија, особено во областите на социјалната политика, образованието и здравството, Гаши порача дека не може да се игнорираат бариерите што се уште постојат.
– Стереотипите за улогата на жената во јавниот дискурс, недоволната застапеност на жените на највисоките раководни позиции, како и новите форми на дигитално насилство и дезинформации, продолжуваат да го отежнуваат патот на многу жени кои сакаат да влезат или да остaнат активни во политиката. Оваа тркалезна маса е замислена токму како простор каде овие предизвици ќе се именуваат отворено, без табу и без политизирање, со единствена цел, да најдеме заеднички, применливи решенија, рече Гаши.
Посочувајќи го напредокот на Собранието во оваа област, Гаши рече дека колку и да се добро формулирани законите и стратегиите, сепак потребна е постојана соработка меѓу законодавната и извршната власт, меѓународните организации и граѓанското општество, за политиките навистина да заживеат во пракса и да произведат реална промена во животот на жените кои сакаат да учествуваат во политичкиот и јавниот живот на нашата земја.
