На 26 септември 2026 година (сабота) со почеток во 18:00 часот во спортската сала во Куманово, ќе се одржи натпревар од Суперкупот на Македонија „Драган Василев – Цевка 2026“, на кој ќе се соочат екипите на МКК Куманово и КК МЗТ Скопје Аеродром во машка конкуренција, информираа денеска од општина Куманово.
Овој значаен спортски настан годинава ќе биде во знак на јубилејот 80 години кошарка во Куманово. Осум децении кошарка, традиција, љубов и страст кон спортот, што низ генерации го обединуваат градов и ја создаваат богатата кошаркарска приказна на Куманово. Ова претставува можност кумановската спортска публика да проследи врвен кошаркарски натпревар, исполнет со спортски дух, фер – плеј и вистинска кошаркарска атмосфера, поттик за генерациите, кои ќе ја продолжат кошаркарската традиција.
