Од сали што со години чекаат подобри услови, до нови простори во кои спортот треба да стане секојдневие на учениците. Со европска поддршка, се реконструираат 30 училишни сали и се градат 30 нови. Набавена е и нова спортска опрема во основните и средните училишта, се со цел за подобра училишна инфраструктура.
„Станува збор за проект на реконструкција на 30 училишни сали и дополнителна изградба на нови 30 училишни сали. Во оваа прилика ќе видиме една од нив и ја користм можноста да им се заблагодарам на сите наши странски пријатели, секако на ЕУ и евроамбасадорот Рокас во Македонија за сето она што го прават за нашата земја како помош“, вели Весна Јаневска, министер за образование и наука.
Една од реконструираните сали е онаа во основното училиште „Панајот Гиновски“ во Бутел, која денеска повторно се отвора за учениците. Салата е само дел од промените во училиштето. Предвидена е и доградба на објектот, со четири нови училници, два санитарни јазли и ходник. Главната цел е да се обезбедат услови за сите ученици да следат настава во една смена, наместо досегашната двосменска настава. Проектот е кофинансиран од страна на европските финансиски институции, како Инвестициската рамка за Западен Балкан и Развојната банка на Советот на Европа.
„Ова е важен чекор во подобрување на условите за спортските сали во училиштата. Секоја инвестиција во образованието е најдобро потрошено вложување. Заеднички се фокусираме со Министерството. Затоа, денес е навистина добар ден, кој ги заокружува нашите заеднички напори за постигнување подобро ниво на образование“, изјави Михалис Рокас, Евроамбасадор во Македонија.
Од почетокот на годината, Владата започна реализација на голем инвестициски проект, за изградба и опремување на 145 училишни спортски сали низ целиот регион. Ваквите проекти се од исклучително значење за подобрување на условите за физичкото образование за да се поттикне поголема физичка активност кај младите.
