Собраниската Комисија за прашања на изборите и именувањата на денешната 60. седница ја утврди Предлог-одлуката за именување на Елена Кузмановска Биондиќ за член на Комисијата за заштита на конкуренцијата, по претходно објавен јавен оглас поради оставката на досегашниот член Никола Трајчевски.
Како што информираше претседателот на Комисијата, пратеникот Ѓорѓија Сајкоски од ВМРО-ДПМНЕ, на огласот биле пријавени двајца кандидати, Елена Кузмановска Биондиќ и Благица Тодоровска. Според материјалите доставени до Собранието, Кузмановска Биондиќ ги исполнува сите законски услови за избор, додека Тодоровска не доставила доказ дека поседува еден од меѓународно признатите сертификати за активно познавање на англискиот јазик, што е еден од законските критериуми за членство во Комисијата.
Претседателот на пратеничката група на ВМРО-ДПМНЕ и коалицијата Никола Мицевски предложи за член на Комисијата за заштита на конкуренцијата да биде именувана Кузмановска Биондиќ, образложувајќи дека ги исполнува сите пропишани услови. Предлогот беше поддржан со седум гласа „за“.
Кузмановска Биондиќ е дипломиран економист и магистер по економски науки од областа на финансискиот менаџмент, со долгогодишно искуство во јавната администрација и дипломатијата. Во кариерата работела како ревизор и внатрешен ревизор, а извршувала и функции државен секретар во Министерството за транспорт и врски и во Министерството за надворешни работи, како и амбасадор во Министерството за надворешни работи и надворешна трговија.
Комисијата, по дополнувањето на дневниот ред, ја утврди и Предлог-одлуката за разрешување и именување претседател и членови на Одборот за доделување на државната награда „Мито Хаџи Василев Јасмин“. За претседател на Одборот беше избран Нове Цветановски, а за членови Братислав Ташковски, Драган Милосавлевиќ, Весна Ивановска, Пандорка Арсовска Гацова, Миле Ристески, Искра Коровешовска, Димитар Петрески, Ранко Младеновски, Гордана Ѓорчева, Елизабета Арсовска, д-р Фатон Мурсели и Сафер Тахири.
Во рамки на точката „Разно“, Комисијата донесе Одлука за дополнување на одлуката за висината на надоместоците на пратениците за користење автомобил за службени потреби и за трошоци за патарина. Како што беше образложено, измените се од технички карактер и произлегуваат од можноста за користење на електронскиот систем за наплата „М-ТАГ“. Со измените се предвидува пратениците да доставуваат посебен извештај за користењето на овој начин на плаќање за секој поднесен патен налог, со цел да се зголеми транспарентноста и контролата на исплатите.
Комисијата ги разгледа и барањата за остварување право на плата по престанок на функцијата од поранешни министри, согласно член 19 од Законот за плата и други надоместоци на избрани и именувани лица. Едногласно беа усвоени решенијата за Цветан Трипуновски, поранешен министер за земјоделство, шумарство и водостопанство, Фатмир Лимани, поранешен министер за социјална политика, демографија и млади, како и за Игор Филков, поранешен министер за правда, на кои им е одобрено користење право на плата по престанок на функцијата во траење од 12 месеци.
