Војната на Блискиот Исток нема да заврши наскоро, последиците ќе ги чувствува целиот свет. Според домашните безбедносни аналитичари, овој конфликт не е изолиран инцидент, туку дел од поширока стратешка пресметка што трае со децении. Директниот судир меѓу САД и Иран носи неколку сериозни ризици – дипломатски и глобални економски притисоци.
„Ако е крајната цел да се смени режимот во Техеран и да се уништат капацитети, не би рекол, не сум оптимист дека ќе заврши брзо… таков режим да се смени во краток рок“, изјави Зоран Додевски, пензиониран армиски полковник.
„Ако они почна да напаѓаат каде што има нуклеарно оружје за збогатување на ураниум… ако напаѓале резиденцијата на лидерот на државата, тоа ни е порака дека режимот мора да падне. Не одговара на САД долгорочно војување… Трамп кажа јасно – еве им шанса да ја преземат власта“, изјави Раби Седрак, директор на Институт за меѓународни стратегиски и безбедносни студии.
Според новинарот Дејан Андоновиќ, намерата на американскиот претседател Доналд Трамп кон Иран е јасна – целосно запирање или строго ограничување на иранската нуклеарна програма, слабеење на воените капацитети на Техеран и создавање услови за политички промени во земјата.
„Трамп е свесен дека долга војна или копнена инвазија врз Иран е невозможна… веројатно ќе оди на некоја брза победа… да се обиде да ѝ покаже на меѓународната јавност дека завршил работа“, изјави Дејан Андоновиќ, новинар.
Експертите предупредуваат дека ако има продлабочување на судирот меѓу САД и Иран, тоа индиректно ќе влијае и врз Македонија, пред сè од економски аспект. Можни се зголемување на цените на горивата и инфлаторни притисоци.
