Делегација од Службата за противпожарна заштита и спасување од германскиот град Оберхаузен беше во работна посета на општина Гостивар. Покрај колегите пожарникари, гостите имаа прием и кај градоначалникот на општина Гостивар, Ваљбон Лимани.
Гостите кои се искусни професионалци со над 30-годишно искуство во областа на противпожарната заштита – Михаел Јендријан, раководител на противпожарната единица од Оберхаузен, и неговиот заменик, Свен Цулигхофен разговараа за планираните активности.
– Главната цел на нивниот престој во Гостивар е да извршат стручна и детална процена на оперативните капацитети на Територијалната противпожарна единица (ТППЕ) Гостивар. Анализата ќе ги опфати увид во техничката опрема, организациската поставеност, работните процедури, како и дефицитарните потреби од дополнителни обуки- изјави по средбата градоначалникот Ваљбон Лимани.
Гостите искажаа благодарност за покажаната соработка и најавија дека врз основа на германските практики и стандарди, експертите ќе изработат конкретни препораки и структурирана програма за обука. Според нив, овој процес ќе постави темели за долгорочна соработка меѓу Гостивар и Оберхаузен, со фокус на спроведување заеднички вежби, модернизација и надградба на опремата и континуирана размена на искуства.
Посетата и проектните активности на германските противпожарни експерти се реализираат со поддршка од организацијата „Engagement Global“, а финансиските средства се обезбедени од германската сојузна покраина Северна Рајна-Вестфалија и Германското сојузно министерство за економска соработка и развој.
