Просечната нето плата поголема за цели 8.000 денари за двегодишниот мандат на владата. Пратеникот на Вмро-ДПМНЕ, Бојан Стјаноски вели дека официјалните статистички податоци потврдуваат дека платите во Македонија бележат значителен раст. Ако во март 2024-та година, просечната нето плата во земјава изнесувала 40.496 денари, во март годинава достигнала 48.433 денари. Тоа е пораст, вели Стојаноски од речиси 20%.
„Тоа значи дека за две години просечната нето-плата е зголемена за близу 8.000 денари, односно за 19,6 проценти.Во истиот период, растот на цените изнесува 7,8 проценти. Кога растот на платите ќе се коригира со растот на цените, реалното зголемување на просечната плата изнесува близу 11 проценти. Тоа значи дека платите не само што го следат растот на цените, туку растат значително побрзо и реално ја зголемуваат куповната моќ на граѓаните“ – вели Бојан Стојаноски – ВМРО-ДПМНЕ.
Особено голем раст од 7,6% има кај индустриското производство во април. Зголемувањето доаѓа по лошиот старт годинава и во време на воен конфликт на Блискиот Исток. Раст има и кај другите сектори.
„Најголемо зголемување во апсолутен износ има во информациите и комуникациите, транспортот и складирањето и рударството. Процентуално, највисок раст има во транспортот, дејностите поврзани со недвижен имот и образованието.Овие бројки се потврда дека економските политики даваат резултати и дека приходите на вработените растат“ – вели Бојан Стојаноски – ВМРО-ДПМНЕ.
Стојаноски додава дека целта е платите да продолжат да растат побрзо од цените, да се отвораат подобро платени работни места и граѓаните да имаат повисок животен стандард. Државната статистика потврди дека невработеноста падна на историски најниско ниво од 11,3% во првите три месеци од годинава.
