Месечните примања на судијата Ѓоко Ристов, неговата сопруга и поблиското семејство не одговарале со 350 илјади евра кои беа најдени заѕидани во куќата на неговите родители.
Со економско вештачење продолжи судењето за поранешниот апелациски судија. Обвинителството ги презентираше и пораките од неговиот телефон, а и контактите кои ги имал запишано.
Обвинителката тврди дека со економскиот вештак, екс-судијата нема докажано потекло за заѕиданите пари, додека одбраната вели дека Ристов 20 години работел па стекнал толкав имот.
Претходно презентирани беа разговори снимени со посебни истражни мерки, за кои Обвинителството објасни дека снимките го покажуваат начинот како биле договарани средби меѓу судијата Ристов и лица поврзани со двајца обвинети за тешки кривични дела. Обвинителката Искра Хаџивасилева посочи дека женскиот глас што се слуша во дел од разговорите е на Симона Ристова, сопруга на обвинетиот судија и државна правобранителка за подрачјето на Скопје.
