Едукативна трибина во рамките на кампањата „Розев Октомври“ ќе се одржи денеска во Општината Кисела Вода.
Настанот, кој се реализира во соработка со Здружението „Хема-Онко“, е целосно посветен на превенцијата, раното откривање и лекувањето на цервикалниот канцер. Целта е преку стручни совети и реални искуства да се подигне свеста за важноста на редовните прегледи.
За овие клучни теми, пред присутните ќе говорат проф. д-р Ирена Алексиевска Папештиев, специјалист гинеколог-акушер и директор на Универзитетската клиника за гинекологија и акушерство и проф. д-р Виолета Клисаровска, онколог при ЈЗУ Универзитетска клиника за радиотерапија и онкологија.
На трибината ќе се обрати и Анита Бошкова, правник и поетеса, која ќе го сподели своето лично искуство како пациентка и ќе зборува за значењето на навременото откривање на болеста.
Од општината Кисела Вода упатуваат отворен повик до сите заинтересирани граѓани да присуствуваат на настанот. Преку знаењето, отворениот разговор и споделените искуства, сите заедно можеме да придонесеме кон поголема свесност за здравјето на жените, посочуваат од општината.
