Општина Пехчево, во соработка со Одделението за внатрешни работи (ОВР) Берово и ОЈУДГ „7-ми Септември“ – Пехчево, реализираше успешна едукативна активност под мотото „Денес учиме да бидеме безбедни во сообраќајот“. Настанот беше наменет за децата од најголемата група на возраст од 5 до 6 години, со цел уште од најрана возраст да се соочат со основните правила за безбедност на патиштата.
Преку разговор, интерактивни игри и практични примери, децата на интересен и за нив разбирлив начин научија како правилно и одговорно да се однесуваат како активни учесници во сообраќајот.
Во рамките на едукативната средба, децата имаа можност да совладаат повеќе основни сообраќајни правила.
-Децата учеа за правилно движење: Каде и како треба да се движат пешаците кога користат тротоар или пешачка патека. Безбедно преминување: На што треба да внимаваат пред да стапнат на улица и како правилно се користи „зебрата“.
Препознавање знаци: Запознавање со основните сообраќајни знаци и значењето на светлосните сигнали на семафорот. Почитување на правилата: Развивање свест за тоа зошто е важно секогаш да се почитуваат сообраќајните прописи, информираа од Општина Пехчево.
Превенцијата како што додадоа е клуч за безбедни улици
Посебен акцент на оваа активност беше ставен на создавањето правилни сообраќајни навики од најмали нозе.
Навремената едукација и превенцијата според нив се сметаат за најважен столб во унапредувањето на безбедноста на сите граѓани, а особено на децата.
Преку ваквите континуирани заеднички проекти, Општина Пехчево, ОВР Берово и градинката „7-ми Септември“ како што подвлекоа продолжуваат активно да придонесуваат за подигнување на сообраќајната свест и градење на идни генерации кои ќе бидат внимателни, одговорни и безбедни на улиците.
