Две правни лица од Велешта вршеле ископ во близина на изворите во Шум кои снабдуваат со вода над 20.000 домаќинства во Струга и струшко. Испитувајќи ги причините за енормното загадување на извориштето, иако постои забрана за вршење на земјени работи, истражните органи живи ги фатиле додека со машини вршеле кршење, ископ и транспорт на карпи во поголем обем во непосредна близина на изворите.
”Поради сомненија за кривични дела – незаконита експлоатација на минерални суровини и загадување на водата за пиење, надлежниот јавен обвинител до судијата на претходна постапка веднаш достави предлог за определување мерки на претпазливост – забрани на правните лица да ги посетуваат парцелите каде вршеле ископ и забрана да преземаат какви било работни активности на подрачјето”, велат од ОЈО Струга
Основното јавно обвинителство Струга продолжува да презема дејствија за обезбедување докази и испитување на евентуална кривична одговорност во однос на загадување на изворите во кои е пронајдена ешерихија коли и ентерококни бактерии од фекално потекло. Матноста на водата периодов беше зголемена над 20 пати повеќе од дозволеното. И додека се чекаат резултатите од Институтот за јавно здравје во Скопје каде се врши проширена анализа со цел, меѓу другото, да се испита и радиокатвноста, надлежните алармираат да се превземат итни мерки за санирање на состојбите.
”Оние ископини што се направени, така е земјата растресена, не е набиена и водата од врнежите понира долу и автоматски со себе носи и честички од земјата. Па некои дупи се со длабочина од 25 метри. Уште малку до долу ќе слезеле и извор да немаат стружани и вода. Да се исполнат овие дупки” – вели Лидија Симоноска – Центар за јавно здравје Охрид.
Одговорност побара и заменик министерот за правда Ален Деребан. Станува збор, вели, за кривично дело нелегална експлоатација на минерални суровини кое не смее да помине неказнето бидејќи оние кои што го вршеле тоа дело немале никаква дозвола ниту концесија за работа.
“Под значителна штета кривичниот законик подразбира штета или корист во висина од 50 просечни плати, за тоа дело е предвидена казна затвор од 1 до 10 години. Работа на обвинителството е во оваа предистражна постапка да пронајде докази со кои ќе утврди причинско-последична врска на нелегалната експлоатација со загадување на изворите за пиење” – вели Ален Деребан, заменик министер за правда.
Водата од градскиот водовод половина месец е забранета за пиење, стружани купуваат флаширана вода. За илустрација, само еден диструбер дневно испорачува околу 15 тони вода за потребите на стружани.
