По вонредниот инспекциски надзор во Прилепската болница, Државниот санитарен и здравствен инспекторат ќе бара постапка за дисциплинска одговорност кај здравствените работници кои учествувале во лекувањето и исписот на новороденчињата – близнаците кои починаа на 16 јануари. Од ДСЗИ велат дека до министерот за здравство ќе иницираат постапка за стручен надзор над работата на Прилепската болница согласно закон.
Инспекторатот констатирал дека кога на 10 јануари мајката со потпис, на свое барање, заминала од болницата со новороденчињата (предвремено родени и со мала тежина), болницата не го известила Центарот за социјални работи. Од страна на докторите било инсистирано мајката да остане во болницата се додека бебињата целосно се адаптираат, но таа барала да бидат испишани.
Од Прилепската болница велат дека ќе биде формирана внатрешна комисија која ќе го испита случајот. Близнаците, како недоносени, биле родени спонтано, во 34-та гестациска недела. Новороденчињата биле испишани од болницата на 10 јануари. На 16 јануари близнаците починаа, а според лекарите од Прилепската болница, тие биле премрзнати.
