Скокнал од булдожерот во движење додека се обидувал да направи пресек за да го спречи огнот да навлезе во Националниот парк „Пелистер“. Работник заврши во болница со повредени ребра, по синоќешната борба со огнената стихија. Тој е пренесен веднаш во болница, а според надлежните, состојбата не е критична. Освен овој случај, засега нема други повредени пожарникари во битката со пламените јазици во овој крај.
Изјава: Стојанче Ангелов, раководител на Главниот штаб за управување со кризи
Досега немаме повреден ниту еден пожарникар. Не е точна веста која се појави во неколку портали дека има двајца повредени пожарникари. Ниту повреден пожарникар, ниту пак имаме пожарникар кој вдишал чад. Така што сите пожарникари се добро и продолжуваат во борбата против оваа огнена стихија.
Со надчовечки напори, пожарникарите од Битола, Ресен и огнените тимови на Дирекцијата за заштита и спасување го гаснеа пожарот кој во текот на целата вечер беснееше на Пелистер. Со помош на пинцгауерите кои гаснеа од земја и „ер тракторите“ кои од утринава фрлаа вода од воздух, Националниот парк е спасен и не се дозволи огнената линија да навлезе во шумата. Над планината леташе и армискиот хеликоптер, кој со прецизно фрлање на неколку тони вода успеа да изгасне неколку критични точки. Сепак, опасноста не е завршена. Лошиот терен, силниот ветер и лесно горливиот материјал, како што се лисјата и сувата трева, само им ја отежнуваат работата на пожарникарите.
„Дождот кој вчера заврна во источните делови во државата ја олесни нашата работа, но не значително. За жал, во останатите делови од државата имаме тешки за гасење пожари, повеќе од 30 пожари во текот на вчерашниот ден. И понатаму најтежок и најкомплексен пожар за гаснење е пожарот кој вчера попладне изби од преспанската страна на Пелистер, оган кој се движи во насока на Националниот парк „Пелистер“, изјави Стојанче Ангелов, раководител на Главниот штаб за управување со кризи.
„Пожарот е на многу лош терен, се шири и во дабова и борова шума, има премногу горлив материјал, собиран со години – години лисја, многу тешко е да се гасни“, изјави командирот на ТППЕ Битола, Христијан Тодоровски.
„Националниот парк се брани надвор од неговите граници затоа што кога пожарот ќе навлезе длабоко во повисоките регии, тогаш не можеме да дејствуваме затоа што станува збор за планина со алпски карактеристики“, изјави Иванчо Тошевски, директор на Националниот парк „Пелистер“.
Критично е и на планината Жеден. Тешко пристапниот, а на делови и целосно непристапен терен, ги прави условите невозможни за гаснење од земја. Таму гори сува трева, трње, грмушки и ниска вегетација. За среќа, огнот не стигнал до блиските села и не претставува закана за локалното население кое живее на подножјето на планината.
Во изминатите 24 часа, на територијата на Македонија повторно беснееја повеќе од триесетина пожари. До пладнево регистрирани се вкупно 10 на отворен простор, од кои 7 се активни, еден е под контрола, а два се изгаснати. Надлежните и понатаму апелираат на поголема свесност на граѓаните, затоа што и најмала искра може да предизвика катастрофа.
