Истиот модел кој се предлага за приклучување на Украина кон ЕУ, треба да се однесува и за останатите држави од регионот, порача хрватскиот премиер Андреј Пленковиќ на прес-конференцијата по повод потпишувањето на договорот за стратешко партнерство меѓу Македонија и Хрватска. Коментирајќи го писмото на германскиот канцелар Мерц, испратено до Европскиот совет, во кое тој предлага Украина да биде асоцијативна членка, додека Западен Балкан привилегиран набљудувач со забрзана постепена интеграција, Хрватска застана зад Македонија.
„Позицијата на Хрватска е многу јасна: ако се откажеме од концептот на таканаречени индивидуални заслуги за секоја земја поединечно, и ако се создаваат одредени скратени патишта или трансформирани модели на членство, во овој случај пред сè за Украина, тогаш тоа мора да важи подеднакво за сите. Не може за едни да важат едни правила, а за други поинакви. Тоа е нашата прва позиција. Втората позиција е дека постои голема разлика во капацитетот и големината на Украина во однос на сите останати земји-кандидати. Сите други земји се помали по население и помалку комплексни во однос на влијанието врз европските политики, буџетските импликации, економските и секторските политики, како и регионалниот развој и кохезиските фондови. Токму затоа се бара специфично решение“, рече Пленковиќ.
Стратешка цел на Македонија останува целосна интеграција во Европската Унија, пат кон кој земјава го започна уште со стекнувањето на независноста. Но, наместо процесот да остане заснован на европски критериуми и реформи, тој се претвори во билатерализација. Тоа значи дека билатералните прашања станаа дел од европскиот процес, што создаде нова фрустрација кај македонските граѓани, истакна македонскиот премиер. „Цениме дека многу одамна го заслуживме нашето место во рамките на тоа семејство.
Повторно сега имаме уште едно такво барање кое е пред нас. За жал, тоа го прифати претходната влада, мислејќи дека ако добијат бел лист хартија на маса и го потпишат истиот, ќе останат да бидат влада и во иднина. Сè додека билатералните спорови и т.н. булинг кон нас од страна на една земја-членка се наша препрека за да бидеме дел од тоа семејство, што одамна го заслуживме, за жал ќе се одолговлекува, но ние не губиме надеж“, рече Мицкоски.
Двајцата премиери во Охрид потпишаа договор за стратешка соработка меѓу двете влади и меморандум за разбирање и соработка во енергетскиот сектор.
