До крајот на неделава Владата треба да соопшти дали ќе ја прифати понудата од новата Комора, да се изготви листа на 150 производи кои најмногу се употребувани кај граѓаните или ќе оди со ограничување на маржата на околу 1.000 производи. Од Министерството за економија и труд велат дека на последниот состанок со најголемите трговски дистрибутери се договориле одлуката за ова да падне до крајот на неделата…
Од Комората не сакаат да ја откријат содржината на листата со производи и маржите кои за нив ја предлагаат. Така велат дека одлучиле, се додека нема конечен епилог на разговорите со Владата… Неофицијално во листата која што се предлага се шеќерот, маслото, брашното, млекото, пилешкото месо, за кои се предлага маржа од 3 проценти. За лебот, тестенините, оризот, урдата, видовите сирења, кашкавал, јајца, за видовите зеленчук, овошје, но и за дел од средствата за хигиена се предлага маржа од 10 до 15 проценти. Предлогот е мерката да важи од 22 март до 22 април, со што би биле опфатени и празниците Рамазан и Велигден.
