Градоначалникот на Општина Делчево, Иван Гоцевски, престојува во официјална посета на Ешалан, Швајцарија, каде што оствари средба со градоначалникот Серж Борник. Посетата е насочена кон продлабочување на меѓусебната соработка, размена на искуства и запознавање со добри практики од швајцарскиот систем на локално управување.
На средбата, Гоцевски ги претставил тековните активности и развојни проекти што се реализираат во Делчево, со акцент на модернизацијата на општината, подобрувањето на инфраструктурата и унапредувањето на условите за живот на граѓаните. Посебно внимание било посветено на визијата за одржлив локален развој.
-Швајцарија претставува пример за организираност, ефикасност и посветеност, од кој може многу да се научи. Ваквите средби се значајни за стекнување нови идеи и нивна примена во нашата општина- истакнал Гоцевски.
Во рамки на посетата, македонската делегација ја посетила и пречистителната станица за отпадни води во Ешалан, каде што се запознала со современите решенија за третман на отпадните води и заштита на животната средина. Според Гоцевски, искуствата од швајцарските практики можат да бидат корисни и за идните развојни проекти во Делчево.
Тој изразил благодарност за континуираната поддршка што Швајцарија ѝ ја обезбедува на Општина Делчево преку различни проекти насочени кон јакнење на локалните капацитети и подобрување на квалитетот на живот на граѓаните.
Како дел од посетата, била упатена и официјална покана до градоначалникот Борник да го посети Делчево и одблиску да се запознае со природните убавини, културното наследство и развојните потенцијали на градот.
Од Општина Делчево очекуваат дека ваквите средби ќе придонесат за воспоставување долгорочни партнерства и имплементација на современи решенија во интерес на локалната заедница.
