Македонија се подоготвува за нова дигитална инфраструктура – во финална фаза се разговорите за избор на меѓународен финансиски партнер, како и за определување на соодветна локација за изградба на нов дата – центар. Планот е да биде изграден во близина на Скопје, непосредно до една од индустриските развојни зони, каде што веќе се изградени фотонапонски централи. Локацијата ќе биде избрана така што нема да зафаќа плодно земјоделско земјиште и нема да се загрозуваат природните ресурси. Според најавите, до крајот на годината ќе се донесе и национална стратегија за вештачка интелигенција. Една од активностите предвидени со стратегијата ќе биде и донесување закон за употреба на вештачката интелигенција.
„Ние сме во финална фаза на изнаоѓање на локацијата и пронаоѓање на финансиски партнер од меѓународната заедница кој што ќе го поддржи овој проект. Имавме многу квалитетни разговори во изминатите неколку дена со потенцијални финансери на овој проект. Локацијата ќе биде во близина на Скопје, веднаш до една од индустриските развојни зони, тоа е државно земјиште кое што не се употребува за земјоделство или нешто друго.“, изјави Стефан Андоновски, министер за дигитална трансформација.
Дигиталната трансормација станува се повидлива и поблиска до граѓаните. Еден од примерите за тоа се центрите „Една точка за услуги“, преку кои административните услуги се доближуваат до луѓето, особено до оние во руралните средини. Целта е мрежата на овие центри да продолжи да се шири, за граѓаните да не губат време одејќи од една во друга институција. Наместо тоа, на едно место ќе можат да добијат повеќе услуги, во близина на нивното место на живеење. Новиот центар во Гази Баба е 17-ти ваков центар во земјава, а планот е до крајот на годинава нивниот број да е над 20.
„Имаме можност да ја сместиме 17-та по ред канцеларија за услуги, тука во Гази Баба. Тоа е доближување до граѓаните. Искористување на електронските услуги за доближување до оние кои што немаат можности дома да користат дигитални средства, немаат алатки, не знаат или не сакаат да ги користат. Ова е начин како да се доближиме до нив, како услугата да ја добијат побрзо, поефикасно, без да чекаат во редови.“, вели Андоновски.
Од големите дата-центри и инфаструктурата за чување и обработка на податоци, до шалтери кои се поблизу до граѓаните – дигиталната трансформација се гради во институциите, но и на терен.
