На Националната арена „Тодор Проески“ во Скопје денеска со почеток во 10 часот ќе се одржи четвртото издание на Детската трка на Виталиа, манифестација посветена на промоција на спортот, физичката активност и здравите животни навики кај децата.
Како што соопштува организаторот, речиси 1000 учесниците ќе се натпреваруваат на дистанци приспособени на возраста: 100 метри за деца од седум и осум години, 200 метри за деца од девет и десет години, 300 метри за деца од 11 и 12 години и 400 метри за деца од 13 и 14 години.
Покрај спортскиот дел, за посетителите се предвидени и дополнителни забавни содржини, музичка програма и активности за децата, како и едукативен корнер посветен на здравата исхрана и животни навики.
Организаторите нагласуваат дека настанот има пред сè рекреативен и едукативен карактер, насочен кон поттикнување на децата да се занимаваат со спорт уште од најрана возраст. Поради тоа, нема да има прогласување победници, а секое дете што ќе ја заврши трката ќе добие медал како признание за учеството и вложениот труд.
