Брутално избоден до смрт доктор од Скопје. Матичниот лекар Ацо Трповски Според неофицијални информации со 9 убодни рани бил убиен во неговиот автомобил на паркингот пред поликлината Железара. Од МВР соопштуваат дека тој синоќа бил пронајден од неговите синови, кои почнале да го бараат откако од работа не се вратил дома.
-На 21.03.2024 во 23.09 часот во СВР Скопје било пријавено дека во сопственото возило „Киа“ со скопски регистарски ознаки, на паркинг пред поранешната клиника Железара, со убодни рани по телото бил пронајден А.Т.(67) од Скопје. Според пријавеното, тој бил пронајден од неговите синови, кои почнале да го бараат откако не се вратил дома од работа. Лекар од Итна медицинска помош констатирал смрт, а по наредба на јавен обвинител телото на починатиот било дадено на обдукција. Се преземаат мерки за расчистување на случајот, велат од МВР.
Причините за ова брутално убиство засега остануваат непознати.
Трагите од крв на паркингот пред Поликлиниката Железара остануваат сведок на она што се случило на паркингот, каде што до смрт брутално беше избоден 67 годишен матичен лекар од оваа Поликлиника Железара.
За расветлување на убиството на лице место увид извршил и дежурен јавен обвинител од скопското Обвинелство.
-Јавниот обвинител издаде наредба за обдукција, како и наредба за прибирање и анализа на сите траги пронајдени на лице место и за обезбедување на снимки од видеонадзор. Се преземаат дејствија за расчистување на настанот, велат од ОЈО.
Итна разрешница на убиството бара и Лекарската комора. Изразувајќи загриженост велат дека ова предизвикало силна вознемиреност кај докторската фела.
-Истакнуваме јавно барање надлежните институции итно да постапат за овој случај и да ги преземат сите неопходни мерки за да ги утврдат околностите во кои се случил настанот и соодветно на тоа да го пронајдат сторителот и да го санкционираат. Загубата на човечки живот секогаш е тешка, но трагедијата е многу поголема кога тоа е направано на насилен начин. Загубата на доктор е и загуба за целиот здравствен систем, велат од Лекарската комора.
Пред грозоморното убиство според одредени информации докторот Ацо Трповски присуствувал на настан на една фармацевтска компанија.
Матеја Петровски
