Соларната енергија повеќе не е иднина, туку сегашноста на македонската енергетика, но дека следната фаза мора да донесе повеќе ред, планирање и предвидливост, порача министерката за енергетика, рударство и минерални суровини Сања Божиновска на отворањето на петтата Годишна соларна конференција, во организација на Македонската соларна асоцијација – Солар Македонија, која ги обединува компаниите, инвеститорите и експертите од секторот на обновливите извори на енергија.
-Не можеме да градиме обновливи капацитети побрзо од она што мрежата може безбедно да го прими. Со новата регулатива и годишните планови Македонија создава предвидлив амбиент за инвестиции и сигурен енергетски систем. Планираме однапред, ја подготвуваме мрежата и создаваме услови новите инвестиции навистина да бидат функционални и одржливи- истакна Божиновска.
Таа, како што велат од МЕРМС, посочи дека новата законска рамка за енергетика и обновливи извори поставува правила за пофер и попредвидлив инвестициски амбиент, но истовремено обезбедува и поголема заштита на енергетскиот систем.
Особено значаен нов механизам, како што истакна министерката, се годишните планови за развој на енергетската инфраструктура, преку кои однапред ќе се утврдува каде, кога и какви нови капацитети може да се развиваат, во согласност со реалните можности на мрежата.
-Сакаме да ставиме крај на пристапот „прво да изградиме, па потоа да бараме решение за мрежата“. Паралелно со новите соларни и ветерни капацитети, Министерството работи на зајакнување и дигитализација на преносната и дистрибутивната мрежа, како и на развојот на батериското складирање. Иднината на обновливите извори не е само во тоа колку произведуваме, туку колку паметно ја користиме и ја складираме енергијата- рече Божиновска.
Посочи дека Македонија се подготвува и за следната генерација енергетски технологии. Со првата сеопфатна Водородна студија и новата енергетска инфраструктура се планира со поглед кон идните технологии. Како пример го наведе гасниот интерконектор со Грција, кој е проектиран со можност за иден транспорт на зелен водород.
Божиновска упати и јасна порака до инвеститорите дека државата останува отворена за нови инвестиции во енергетиката, но дека тие мора да се развиваат во рамки на јасни и еднакви правила.
-Вратата е отворена, но правилата мора да бидат јасни и еднакви за сите. Нашата задача е да создадеме систем во кој добрата инвестиција има сигурност, државата има контрола врз својот енергетски систем, а граѓаните добиваат сигурна и достапна енергија. Да ја градиме енергетиката на Македонија – со повеќе сонце, повеќе инвестиции, посилна мрежа и јасен план за иднината- посочи Божиновска.
