Министерката за енергетика, рударство и минерални суровини Сања Божиновска учествуваше на панелот Engineering the Infrastructure of Energy Security во рамките на Делфи-економскиот форум, каде што заедно со високи владини претставници и лидери од енергетскиот сектор се дискутира за иднината на енергетската безбедност во регионот.
Во своето обраќање министерката Божиновска нагласи дека земјата влегува во нова фаза на енергетско позиционирање.
– Денес, ние свесно се позиционираме како регионален енергетски јазол што ги поврзува пазарите, изворите и партнерите – истакна Божиновска.
Таа ја претстави стратегијата базирана на три клучни столба: интерконекторот со Грција како директен пристап до алтернативни извори на гас и ЛНГ-терминали, соработката со Србија, која отвора северен коридор и овозможува двонасочен проток и партнерството со САД преку ЛНГ-иницијативата, со што се зајакнува енергетската независност.
– Енергетската политика без инфраструктура останува само декларација. Со изградбата на овие коридори ја намалуваме ранливоста, создаваме поконкурентни цени и се позиционираме како транзитна земја што додава вредност – посочи министерката.
Божиновска потенцира дека новата улога на земјата не е само транзитна, туку стабилизирачка за поширокиот регион.
– Не сакаме да бидеме периферен пазар – туку сигурен партнер во европската енергетска мрежа – додаде таа.
Во однос на енергетската транзиција, Божиновска истакна дека пристапот на државата е прагматичен и насочен кон сигурност:
– Нема енергетска транзиција без сигурност – и нема сигурност без диверзификација. Географијата сама по себе не е предност ако не се претвори во политика. Нашата цел е да станеме фактор на стабилност на регионалниот пазар на електрична енергија – рече Божиновска.
Со зајакнувањето на јужните и северните енергетски коридори, Македонија се позиционира како активен учесник во стабилизирањето на енергетските текови во регионот.
Клучната порака што Божиновска ја испрати од Делфи е јасна дека „градиме енергетски систем, кој е диверзифициран, поврзан и стратешки релевантен – со улога што ќе го дефинира нашето место во Европа во децениите што следуваат“.
