Денеска, со гордост и длабок почит го одбележуваме 35 години од денот кога македонскиот народ со непоколеблива волја ги стави темелите на суверена и самостојна Македонија. Наша обврска и неуморна задача за да изградиме држава во која идните генерации ќе живеат достоинствено е да го трансформираме енергетскиот систем, порача министерката за енергетика, рударство и минерални суровини Сања Божиновска, во својата честитка по повод Денот на независноста на Македонија – 8 Септември.
Таа нагласи дека како министерка за енергетика, рударство и минерални суровини, нејзината заложба е јасна, а тоа е Македонија да биде енергетски независна држава.
-Како министерка за енергетика, рударство и минерални суровини, мојата лична и политичка заложба е јасна: Нема вистинска државна независност без енергетска независност. Не можеме да говориме за силен суверенитет додека зависиме од туѓи енергетски кризи и увоз – нагласи Божиновска.
-Македонија има потенцијал и знаење за сами да ја управуваме нашата енергетска иднина! Нашата татковина заслужува да биде силна, економски стабилна и енергетски самостојна. Тоа е нашата борба денес, тоа е новиот генерациски завет за Македонија. Честит 8 Септември, Денот на независноста! Да ни е вечна, силна и горда Македонија! – истакна министерката.
