Азискиот пазар е нова можност за извоз на македонските производи. Во време на глобална криза, азиските компании се заинтересирани за поблиска соработка со македонските. Целта е излез на пазар од 15 до 20 милиони конзументи кои треба да бидат опслужени со македонски производи.
„Ова е релативно нормален пазар. Не се големи бројки. Нашите компании некогаш, во поранешната држава, биле дел од таа бројка на клиенти, конзументи, пазар и еве сега можности и со оваа соработка повторно да се освои еден таков пазар, меѓутоа треба добро да се размисли кога ќе се вети дека мора да испорачаме одредена бројка или количина на производи“, изјави Миле Бошков, претседател на конфедерација на работодавачи..
По посетата на саемот во Тајпеј од страна на Бизнис конфедерацијата на Македонија, заклучокот е дека македонските производи се со повисок квалитет од тие што се продаваат таму. Пазарот е посебно заинтересиран за македонската традиционална храна, како ајварот, пинџурот, лутеницата и македонското вино. Во следните неколку месеци македонските компании ќе бидат запознаени со барањата од Тајпеј, а тоа се зголемување на капацитетите за производство, подобрување на стандардите за квалитет и сигурно ќе биде потребна и реорганизација на компаниите.
„Крајот на 2026 година и почетокот на 2027 година, за време на првите бизнис форуми, ќе ги претставиме македонските производи кои мислиме дека можат да бидат дел од крајната потрошувачка или од заедничкото производство и заедничката продажба“, изјави Миле Бошков, претседател на конфедерација на работодавачи.
Според Бошков, македонските компании со кои се разговарало побарале цврсти преддоговори за да можат да ги приспособат нивните капацитети за отворените нови пазари. Тие се претпазливи, а според предвидената динамика, првите средби ќе се остварат есенва, на првиот бизнис форум во Македонија. На почетокот на следната година во Тајпеј би се склучиле партнерствата за идната евентуална соработка.
