Во концертната сала на Центарот за култура во Дебар се одржа 17-то издание на детскиот музички фестивал на македонски јазик „Радика Фест 2026“.
Беа изведени 13 нови авторски композиции а за најдобра, стручното жири ја прогласи песничка „Сонце во нас“ во изведба на Бида Оручоска од Косоврасти, која со нејзината прекрасна интерпретација и сценски настап ги воодушеви присутните.
Првото место од публиката го освои Ада Кадриоска од Бороец Струга, за најдобар вокал и најдобар сценски настап беа наградени Џана Рамаданоска и Мелда Кадри и двете од Дебар.
Најпрво присутните, кои ги имаше од поширокиот дебарски регион, ги поздрави и им посака пријатни мигови, а на учесниците многу успех, познатиот дебарски композитор Зинче Мимидиноски, инаку директор на фестивалот, благодарение на чија неуморна работа и ангажираност а на радост на децата од поширокиот регион, живее оваа културна манифестација.
На овој значаен настан за децата, кои со нетрпение го очекуваат секоја година, настапија деца од Дебар, Центар Жупа, Маврово и Ростуше, Струга и Охрид како и автори на текстови од Дебар, Струга, Охрид, Кичево, Крива Паланка, Битола, и Прилеп.
За особен придонес во развојот на Фестивалот “Радика-Фест” од страна на директорот на Фестивалот благодарници им беа врачени на Генци Садику, директор на ООУ “Пенестиа” – Дебар, Бенази Шемовска, директор на ООУ Мустафа Кемал Ататурк – Центар Жупа, Алија Идризоски, директор на ООУ Ристе Ристески – с. Д. Косоврасти и Мевмед Абдију, директор ООУ Блаже Конески – Скудриње.
Во 17 годишното постоење на фестивалот изведени се над 220 песнички а учествувале околу 440 учесници од сите делови на државава.
Гости во програмата на Фестивалот беа прекрасната фолклорна група Скудриње од Општина Маврово Ростуше, како и триото Аниса, Есра, Џансу од Општина Центар Жупа.
Фестивалот финансиски беше поддржан од Министерство за култура и туризам, Општина Дебар, Општина Центар Жупа, ТД „Боград“ и „Арсенал“ од Струга, ТД „Гајрет“ од Лабуништа „Јасен“ од Подгорци, се потпомогнат и од Центарот за култура – Дебар.
