Државниот архив на Македонија ја одбележува Архивската недела под слоганот „Отворени за светот: Архивите како активна сила за правдата, меморијата и иднината“.
Меѓународниот ден на архивите – 9 јуни, се одбележува секоја година во чест на основањето на Меѓународниот совет на архивите (ICA) во 1948 година, под покровителство на УНЕСКО.
Во периодот од 8 до 12 јуни се одржува Архивската недела, која го нагласува значењето на архивите како активни чинители во зачувувањето на колективната меморија, заштитата на правата на граѓаните и градењето на иднината. Овогодинешното мото ја истакнува потребата архивите да бидат отворени, достапни и поврзани со заедницата, покажувајќи дека тие не се само чувари на минатото, туку и важен фактор во развојот на современото општество.
По тој повод, Државниот архив организира серија настани посветени на промоцијата на архивското наследство и неговата достапност за јавноста.
Во рамките на Архивската недела, утре во НУ Музеј на тетовскиот крај во Тетово че има промоција на книга и изложба посветени на османлискиот период во Македонија. На 10 јуни во НУ ЦК „Tрајко Прокопиев” во Куманово ќе биде промовирано јубилејното издание „Државниот архив – столб на македонското битие“, проследено со изложба по повод јубилејот на Државниот архив.
