Здружението „16 Март 2025 – Кочани“ изготви технички проект за изградба на спомен-обележје кое ќе биде посветено на загинатите во трагедијата во клубот Пулс.
Спомен-обележјето со називот „Ангели“ треба да биде на планината Пониква, во близина на локалитетот Аеродром. Според проектот, се работи за монумент со парковско уредување на површина со димензии 30 на 40 метри. На средина ќе биде поставен метален столб висок 9 метри. Се предвидува да се изгради мал параклис, да се постават клупи и да се засадат дрвца.
Идејата за монументот е на Тошо Антов, чија единствена ќерка настрада во трагедијата. Здружението има добиено согласност од Јавното претпријатие за државни патишта, со оглед на тоа што монументот „Ангели“ е во непосредна близина на регионален пат. Барање за согласност е доставено и до Советот на општина Кочани, по што општината треба да издаде решение за поставување на урбана опрема.
