Иднината на дигиталните финансии нема да ја изградат ниту државата сама, ниту банките, ниту технолошкиот сектор. Потребни се соработка, отворен дијалог и, најважно, премин од идеи кон конкретни решенија – рече денеска министерот за дигитална трансформација Стефан Андоновски на Finelevate Digital Summit 2026.
На самитот присуствуваа претставници на институции, финансискиот сектор, технолошки компании и стартапи, а Андоновски се обрати и потоа учествуваше на еден од панелите, посветен на дигиталниот идентитет, доверливите услуги и интероперабилноста во финансискиот сектор.
– Кога на исто место ќе се соберат институциите, финансискиот сектор, технолошките компании и стартапите, разговорот за дигитализацијата станува многу поконкретен. Зборувавме за поврзување на системите, за безбедна размена на податоци и услуги што ќе може целосно да се завршат електронски. Ако институциите веќе располагаат со одреден податок, граѓаните и компаниите не треба повторно да го доставуваат – изјави министерот.
Андоновски оцени дека ваквите настани се важни зашто овозможуваат заеднички да се препознаваат проблемите и можностите.
