Амбасадорот на Република Словенија во земјава, Грегор Прескер, денеска го посети Пехчево, каде што се запозна со активностите реализирани во рамки на проектот „Вештини – клучот на зелената економија“, поддржан од Амбасадата на Република Словенија и Министерството за надворешни и европски работи на Република Словенија.
Во рамки на посетата, Прескер оствари работна средба со градоначалникот на Општина Пехчево, Александар Китaнски, а беше посетена и работилницата на младиот мајстор Момир, каде што се реализираат активности поврзани со дрводелски вештини, традиционални техники и користење рециклирани материјали.
Проектот има за цел да ги поврзе природата, културата и традицијата и преку обуки и работилници да создаде можности за стекнување практични знаења и развој на локални потенцијали во зелената економија.
Проектната координаторка Јасмина Бошевска посочи дека проектот е поддржан од Владата на Словенија преку словенечката амбасада и Министерството за надворешни и европски работи, а неговата цел е поврзување на природата, културата и традицијата.
-Целта на овој проект всушност е поврзување на еден цел екосистем кој опфаќа природа, култура и традиција. Без овој концепт не би можеле да ги ревитализираме нашите традиционални и културни вредности, но поврзувањето со природата е клучниот фактор, рече Бошевска.
Таа додаде дека во рамки на проектот биле организирани повеќе работилници и обуки, меѓу кои за дрводелски вештини, како и за искористување на есенцијалните масла и природните билки од Малешевијата.
-Токму овде потенцијалот на овие вредности го цениме како есенцијален за развојот на младите потенцијали во зелената економија, истакна Бошевска.
Амбасадорот Грегор Прескер изрази задоволство од посетата и од резултатите постигнати со проектот, посочувајќи дека поддржаните активности имаат значење за локалната заедница и младите.
-Денеска сме тука во Пехчево и бевме заедно и на други локации низ земјата за да видиме што сме направиле добро со овој проект. Денеска тука навистина гледам многу убава работа и дека тоа што сме го поддржале има голема вредност“, рече Прескер.
Според него, проектот отвора можности младите да стекнат нови знаења, да се запознаат со занаетите и традицијата и потенцијално да ги претворат стекнатите вештини во сопствена бизнис-иницијатива.
-Има вредност за локалната заедница, има за младите луѓе кои учат нешто ново, кои се занимаваат со ракотворби и занаети, а ја вклучуваат традицијата во образованието и можеби понатаму и во бизнис, сопствен бизнис кој треба да го развијат. Така локалните заедници да бидат поразвиени, младите луѓе да опстанат тука во вашата земја и во локалните средини, истакна словенечкиот амбасадор.
Тој посочи и на потенцијалот на Пехчево за развој на дрвната индустрија и за создавање перспективи за младите.
-Кога слушам од градоначалникот дека вие имате многу развиена дрвна индустрија, сигурно треба млади луѓе да ја развиваат и понатаму. Да имаат перспектива тука во вашата општина, рече Прескер.
Градоначалникот на Пехчево, Александар Китaнски, изрази благодарност до словенечката амбасада и Министерството за надворешни и европски работи за поддршката на проектот и за изборот Пехчево да биде место каде што ќе се реализираат активностите.
-Како градоначалник и како домаќин сакам да изразам голема благодарност до организацијата што го препозна Пехчево, до амбасадорот од Словенија, до Словенечката амбасада и до Министерството за надворешни работи што го поддржаа овој проект токму да се одржи во Пехчево“, рече Китaнски.
Тој оцени дека активностите во рамки на проектот придонесуваат и за промоција на локалните потенцијали.
-Ние сме горди на тоа и мислам дека влогот и напорот што се направи, оваа работилница да биде и промоција на Пехчево, е уште поголема. Да не слушнат и да не запознаат дека и во Пехчево имаме големи потенцијали за инвестиции и развој на зелената економија и зелениот пазар“, истакна Китaнски.
Во рамки на посетата беше посетен и едукативниот центар во село Негрево, сместен во стара училишна зграда која е реновирана и пренаменета во центар за едукација и запознавање со биолошката разновидност на Малешевијата. Во центарот се претставени природните богатства на регионот, живеалишта, хербариуми, семиња и други содржини наменети за едукативни активности.
Посетата на амбасадорот Прескер беше искористена и за разговори за можностите за продолжување и проширување на соработката, како и за реализација на нови проекти во Пехчево поврзани со зелената економија, заштитата на животната средина, традиционалните знаења и создавањето можности за младите.
Во рамки на проектот, покрај дрводелските обуки, се реализирани и активности за искористување на природните ресурси од Малешевијата. Менторката на проектот посочи дека со децата биле изработувани шумливи бомби, шумлива и ароматична сол, композиции од чаеви, како и материјали од смрека што биле користени за производство на тоници и други природни препарати.
Од Општина Пехчево најавија дека остануваат отворени за соработка со словенечките институции и организации и за подготовка на нови проекти во интерес на локалната заедница.
