На собраниската Комисија за надворешна политика и надворешна трговија денеска е амандманска расправа за Предлог на закон за пријавување и проверка на странски директни инвестиции.
За законот се поднесени од 15 амандмани од кои неколку од пратениците Димитар Ковачевски, Соња Мираковска и Моника Зајкова од пратеничката група предводена од СДСМ и неколку од Сали Мурати од Коалицијата Европски фронт.
Собранието на натамошно читање го даде Предлогот на 121 седница, а тој доби поддршка од сите пратеници. Со предлог‑законот се предвидува воспоставување национален механизам за скрининг на странските директни инвестиции преку кој ќе се спроведува пријавување и проверка во строго утврдени критични и сензитивни сектори, доколку постојат сериозни индиции дека инвестициското реализирање би имало негативен ефект врз националната безбедност, јавниот ред или стратешките интереси.
Според предложеното решение, странска директна инвестиција може да се реализира со претходно донесена позитивна или условно позитивна одлука од страна на Владата ако се стекнува најмалку 10 % од основната главнина и/или правото на глас, а вредноста на стекнувањето е не помала од 50.000 евра во трговско друштво, сектор или критична инфраструктура конкретно утврдени со членот 8 од предлог‑законот.
Заради фактот што во земјава не постои посебен закон или подзаконски акт што ја дефинира критичната инфраструктура, со предлог‑законот се дава правен основ Владата, на предлог на Министерството за одбрана, да ги утврдува секторите и видовите на критична инфраструктура потребни за примената на овој закон.
За надлежен орган за пријавување и проверка е предложено да биде Министерството за надворешни работи и надворешна трговија, кое по претходна постапка на консултации со надлежните институции (МО, МВР, МФ, МЕТ, АНБ, НБРМ, МЕРМС, КЗК и други) ќе дава предлог до Владата дали одредена инвестиција треба да биде дозволена, дозволена под одредени услови или одбиена. Против одлуката на Владата инвеститорот има право да поведе управен спор пред надлежниот суд во согласност со Законот за управни спорови.
Предлог на закон за пријавување и проверка на странски директни инвестиции е на дневен ред на Законодавно правната комисија.
