Филмските фестивали почнуваат да покажуваат интерес за нашите филмови и важно е да се слушнат гласовите од Африка истакна Але Кеир, кинематографер и фотограф од Судан, учесник на ИФФК „Браќа Манаки“.
Неговиот филм „Ништо не се случува откако ќе заминеш“, ја отвори документарната натпреварувачка програма на фестивалот, кој според Кеир е одлична можност за лична и промоција на државата од каде доаѓа.
-Во изминативе години Судан е обележан од политички конфликти и превирања и различните форми на уметност не се многу развиени, но остануваат начин на слободно изразување. Најголем дел од кинематограферите во Судан се самоуки и се обидуваме да направиме промена. За мене фотографијата стана начин на кој можев да го коментирам светот и настаните околу себе. Ова ми е петти филм и се однесува на конкретно време и простор. Во Судан нема повеќе јавни кино сали, проекции има само во мали собички во мали градови или села и се прикажуваат индиски и акциони филмови. Уметностите во Африка тешко опстануваат, но факт е дека во изминатите 15 години се појавија филмаџии во подем, така што сега веќе има продукција која може да се претстави во Европа и во САД. Филмските фестивали почнуваат да покажуваат интерес за нашите филмови и важно е да се слушнат гласовите од Африка, истакна Кеир.
На прес конференција во Битола говореа и кинематограферот кинематографер Жонгџијанг Лијанг и Џинг Зоу од филмот „Непозната девојка“.
-Станува збор за вистинска приказна, но во неа има нешто универзално бидејќи вакви ситуации се случуваат насекаде. Во изминатите 30 години Кина многу се промени така што се надеваме дека не постои повеќе ваква пракса да се напуштаа девојчињата од нивните родители само затоа што се девојчиња. Филмот ќе има премиера кон крајот на овој месец во Кина, а мене ми е големо задоволство што пубиката во Битола ќе го погледне и ќе понесе нешто од него со себе, нагласи Лијанг.
ИФФК „Браќа Манаки“ попладнево продолжува со филмски проекции од повеќе програмски селекции на фестивалот.
