Од вторник приватните превозници ќе возат редуцирано, а најавија и штрајк и блокади ако „ЈСП“ не им го исплати долгот од речиси 100 милиони денари. „Вестор транс“ и „Радос Компани“, веќе повлекоа 80% од автобусите и нема да возат додека не ги добијат парите на сметка. Велат дека вака не можат да продолжат да возат и се приморани да ги остават автобусите во гаража затоа што не можат да ги покријат тековните трошоци.
„Ни немаат исплатено пари повеќе од 4 месеци. Долгот достигна веќе 70 милиони денари и вака повеќе не можеме да издржиме со ова темпо на работа. Принудени сме да повлечеме повеќе од 80% од автобусите. Некои сме принудени и да се откажеме од возење за стално. „ЈСП“ нема пари сметките да си ги плати за струја и вода и цело време чека пари од Градот. А Градот зошто не му пушта пари не знаеме. Советниците гласаа за субвенции, а Градот не ги дава парите. Кај одат тие пари? Плати немаат земено ниту вработените во ЈСП“, велат од „Радос Компани“.
Од „ЈСП“ молк. Не кажуваат зошто ги немаат префрлено парите кои беа излгласани на седница на град Скопје. Советникот од редовите на ВМРО ДПМНЕ, Мартин Стојановски, апелира претпријатието да ги префрли парите во најбрз можен рок и прашува како може претпријатието да е во толку лоша состојба, кога советниците од Град Скопје изгласаа рекордна сума на субвенции.
„Од она што го знаеме „ЈСП“ им нема повеќе од 100 милиони денари исплатен на приватните и затоа апелирам ЈСП да ги исплати. Битно е да се напомене дека ние како советници изгласавме повеќе од 23 милиони евра за неполни две години за 2024 и јануари 2025 за субвенции за „ЈСП“ се сомневам во работењето на менаџметнтот на „ЈСП“ затоа што да се изгласаат рекорден број субвенции, а тие да не се исплатат на приватниците кои се крвотокот на автобускиот превоз на Градот Скопје е сосема негативно и апелрирам јсп да ги исплати апелирам и до менаџментот на Градот Скопје да се зафатат со работа за да имаме добар сообраќај и да не се доведеме во ситуација приватниците да го блокираат градот“, изјави Мартин Стојановски, советник од Град Скопје.
Инаку приватниците веќе почнаа да возат со намален капацитет. Ги нема автобусите со број 9, 19 и 20, во Чаир и Шуто Оризари, но и во други делови од метрополата.