По повеќе од четири децении, државното електромашинско училиште „Коле Нехтенин“ во Штип целосно ќе се реконструира. Со проектот е предвидена нова енергетски ефикасна фасада, обновени училници и современи кабинети. Во тек е подготовката на документацијата, по што ќе биде позната и вредноста на инвестицијата. Реновирањето ќе се реализира етапно и нема да влијае врз наставниот процес.
„Во тек е подготовка на проектната документација за целосна реконструкција на училиштето. Откако ќе биде завршена, ќе почне постапката за реновирање на училишните кабинети, набавка на опрема, нова фасада и слично“, изјави Јованка Шалева, директорка на ДСУ „Коле Нехтенин“ – Штип.
По целосната реконструкција на училиштето, предвидено е отворање и на нови образовни профили, усогласени со потребите на пазарот на трудот. Според градоначалникот, на штипските компании им е потребен млад и квалификуван стручен кадар.
„Она што е наша тенденција е во рамки на сите средни училишта да има можност за еден вид дуално образование, со кое полесно ќе ги вклучиме сите ученици и полесно ќе се адаптираат на пазарот на трудот. Веќе кога ќе го завршат процесот на образование да имаат познавање од реалниот сектор“, изјави градоначалникот на Штип, Иван Јорданов.
Во петте средни училишта во Штип, во септември во прва година треба да се запишат над 500 ученици.
