Костал Македонија, која започна со работа во објектите на поранешниот гигант ЕМО, денес одбележува 10-годишнина од своето постоење и за краток временски период успеа да изгради компанија која денес вработува околу 1.340 лица, со реализирани инвестиции од околу 200 милиони евра. Оваа година очекуваме да достигнеме минимум 280 милиони евра извоз, со потенцијал таа бројка да порасне и до 300 милиони евра, истакна извршниот директор Виктор Мизо. Во рамките на групацијата Костал, македонската локација е втора најголема меѓу седумте производствени погони во Европа. Овде се реализираат најсофистицираните и технолошки најнапредни процеси на глобално ниво.
„Без разлика на сите глобални и европски предизвици, ние имаме зголемување на обемот на работа и на извозот. Во споредба со минатата година, во првите четири месеци бележиме раст од над 20 проценти, а очекувањата се тој раст до крајот на годината да достигне помеѓу 20 и 25 проценти и да се реализира до крајот на годината. Но, признавам дека состојбата во Европа во моментот е неизвесна, секој ден се случуваат различни видови ризици и треба да видиме како сето тоа ќе се развива во следниот период“, рече Виктор Мизо, извршен директор на Костал.
„Кога првпат дојдов овде, остварувавме околу 80 милиони евра продажба. Денес планираме да достигнеме 280 милиони евра. Тоа е навистина неверојатно“, вели Хансјорг Херман, оперативен директор на Костал.
И покрај сите глобални предизвици, Костал годинава очекува раст на приходите и ќе биде меѓу петте најголеми извозници во државата, истакна премиерот Мицкоски.
„Ова е двонасочна улица, треба да се поддржуваме и надополнуваме, бидејќи колку што е Костал поуспешен, толку е поуспешна и македонската економија — и обратно. Колку е државата поуспешна, толку повеќе вреди и бизнисот на Костал во Македонија. Вакви производствени капацитети се од огромно значење за македонската економија, за бруто-домашниот производ и за државата. Владата останува на располагање за секаква логистичка и институционална поддршка, со цел оваа инвестиција во иднина да биде уште поуспешна“, рече премиерот Христијан Мицкоски.
Иако автомобилската индустрија на глобално ниво се соочува со неизвесност, ние како македонска Влада ќе направиме сѐ што е во наша моќ да помогнеме ваквите инвестиции да бидат уште поуспешни, додаде премиерот Мицкоски.
