Пратеничката Иванка Василевска, во својство на шеф на Делегацијата на Собранието во Парламентарниот комитет за стабилизација и асоцијација, денеска оствари средба со Владимир Дробњак, поранешен главен преговарач на Хрватска за пристапните преговори со ЕУ, а во рамки на неговата експертската посета на земјава.
На средбата, информираат од собраниската прес-служба, се дискутираше за процесот на интеграција на државата во ЕУ, моменталните состојби, обврски и предизвици кои стојат пред државата за нејзино идно полноправно членство во ЕУ.
Во пријателска атмосфера двајцата соговорници се осврнаа на повеќе прашања меѓу кои:
– Искуството на Република Хрватска во процесот на преговорите за членство во Унијата;
– Oдредените отстапки кои државата морала да ги направи во текот на процесот, но и за придобивките од членството во Унијата, години подоцна.
Пратеничката Василевска се заблагодари за несебичната поддршка во текот на сите овие години која нашата земја ја добива од Хрватска, и за значајните насоки кои хрватските државници ги пренесуваат како свое искуство на добри практитки, а кои се од исклучително значење за подготовките на земјата за претпристапниот процес.
Дробњак и Василевска заеднички се согласија во тоа дека единствениот прогресивен пат за нашата земја, е рамноправно членство во Унијата, и нејзина интеграција во процесите на унапредување и развивање кон европските стандарди, заедно со останатите држави во Регионот.
