Во присуство на пожарникари, доброволци и претставници на локалните самоуправи од регионот, денеска во кругот на Територијалната противпожарна единица во Кочани беше одбележан 20 Мај – Денот на пожарникарите.
По повод празникот, ЕВН Македонија донираше четирицикл наменет за интервенции и гасење шумски пожари, со што дополнително ќе се зајакнат капацитетите на кочанските пожарникари.
Традиционалната награда за најдобар пожарникар за минатата 2025 година му беше доделена на Горан Стојанов, кој зад себе има десетгодишно искуство во службата. За најдобар доброволец – пожарникар е прогласен Гоце Василков. Тој, од самиот почеток е дел од ДПД – Кочани. Признанијата ги врачи градоначалникот Владко Грозданов.
Според командирот на ТППЕ – Кочани, Драган Апостолов, во текот на 2025 година биле реализирани вкупно 315 интервенции. Градоначалникот Грозданов им упати благодарност на професионалните и доброволните пожарникари за нивната посветеност, пожртвуваност и професионален однос во заштитата на граѓаните и справувањето со пожарите и другите непогоди.
На свеченоста присуствуваа и градоначалниците на Чешиново-Облешево, Јорданче Костадинов, како и на Зрновци, Ванчо Митев.
Во рамки на одбележувањето на Денот на пожарникарите, командирот Апостолов додели благодарници и на општествено одговорните компании што ја поддржуваат работата на единицата, меѓу кои ЕВН Македонија и Видео Лотарија на Македонија.
