Општина Струга почна со дистрибуција на решенијата за плаќање данок на имот за физички и правни лица и за комунална такса – фирмарина. Граѓаните имаат можност за првпат обврските да ги подмират и онлајн, соопшти општинската прес-служба.
Општината aпелира до сите граѓани и правни субјекти да ги подмират своите обврски во законски предвидените рокови, со цел да се избегнат пенали и дополнителни трошоци.
– Новина оваа година е можноста обврските да се подмират и онлајн, преку официјалната платформа на Општина Струга на https://e-tax.struga.gov.mk/, со што значително се олеснуваат процедурите за граѓаните, особено за дијаспората. Ги повикуваме сите граѓани и правни субјекти да ги подмират своите обврски навреме, стои во информацијата.
Локалните власти предупредуваат во случај на неплаќање во законскиот рок, ќе се активира даночен извршител, што е дополнително зголемување на трошоците за обврзниците.
– Комуналните такси претставуваат клучен извор за развој на градот, овозможувајќи реализација на проекти во инфраструктурата, подобрување на јавните услуги и нови инвестиции во заедницата, посочува Општина Струга.
