На јужните падини над Охридското Езеро, во срцето на Плаошник се издига „Свети Пантелејмон“ – храм кој не само што го носи печатот на вековите, туку и тишината на молитвите што никогаш не згаснале. Бидејќи тука, под сводовите, почива Свети Климент Охридски. Ова не е храм што импресионира со големина, туку со скромност што зборува погласно од раскош.
Изминаа цели 26 години од повторното заживување на Свети Климентовата црква и 15 години од започнувањето на проектот за возобновување на Св. Климентовиот универзитет на Плаошник, кој според најавите требаше да биде готов до 2017-та година.
Плаошник е крстопат на духовноста и идентитетот. Овој простор сведочи за континуитет што ретко се среќава. Овде се вкрстуваат патиштата на цивилизациите, вели митрополитот на Дебарско-кичевската епархија г. Георгиј. Востоличен пред една година, негов приоритет е токму светилиштето на писменоста.
„Плаошник, местото каде што Свети Климент на времето поучувал, се молел, бдеел, го изградил универзитетот. Сега е едно прекрасно светилиште, но јас би сакал тој простор да го видам заживеан. Да биде место за средиште, да биде повторно како во времето на Свети Климент – полно со ученици, со луѓе кои разменуваат свои мислења. Затоа што Охрид ни е ликот пред светот, ама тој лик прво ние самите себеси ќе мораме достојно да си го украсиме“, вели митрополитот на Дебарско-кичевската епархија, г. Георгиј.
Градежните активности беа стопирани скоро деценија. Актуелниот министер за култура пред две години посочи дека Плаошник е во лоша состојба.
„Ситуацијата овде е очајна на сите места каде што бевме и морам да кажам дека во изминативе 7 години нашето културно наследство е тотално загрозено, дека воопшто немало никаква грижа, не се одвојувале никакви финансиски средства и е доведена во една очајна состојба, оставена на забот на времето“, рече Љутков (13.07.2024).
Лани Охрид доби 36 милиони денари за возобновување на Свети Климентовиот универзитет. Премиерот Мицкоски сега најави целосно заокружување на проектот Плаошник.
„Следен проект кој што мислам дека треба многу внимателно да му се посвети внимание овде во Охрид е Плаошник. Конечно да го завршиме тој проект, почнат од пред многу време, за жал не бил во приоритетите на многу влади претходно. Оваа година, имајќи предвид можностите на буџетот, одвоивме скромна сума на средства. Важно е да се доподготви проектната документација и следната година многу посилно да се излезе на терен“, вели премиерот Христијан Мицкоски.
Инаку, првичниот проект предвидуваше изградба на 23 објекти, но под притисок на УНЕСКО ќе се градат 6, и тоа: резиденцијалниот објект на МПЦ, конак, Богословскиот факултет, библиотека и музејскиот комплекс со галерија на икони и центар за хуманистички науки.
