Ултиматуми, закани за срамнување со земја, контраудари, па сè до запирање на војната и преговори – состојбата на Блискиот Исток и Иран е целосно конфузна. Единствена константа е растот на цената на нафтата. И покрај благите падови, кои главно зависат од тоа колку е воинствена изјавата на американскиот претседател Трамп, цените се во постојан раст и еден барел нафта не паѓа под 100 долари. Тоа главно се должи на фактот што Ормутскиот теснец, главната артерија за превозот на нафтата, останува затворен веќе трета недела.
По 48-часовниот ултиматум до Иран да го отвори теснецот или да се соочи со целосно уништување на енергетската инфраструктура, Трамп ретерираше и најави дека ќе ги одложи нападите додека траат разговорите со Техеран.
Телоп Трамп „Задоволство ми е да известам дека Соединетите Американски Држави и државата Иран во изминатите два дена имаа многу добри и продуктивни разговори во врска со целосно и тотално решавање на нашите непријателства на Блискиот Исток“,
Во меѓувреме, состојбата на терен се влошува по израелските напади кои предизвикаа реакција од Иран. Техеран се закани дека ако не запрат нападите, тие ќе возвратат и, освен енергетските капацитети, ќе ги уништат и капацитетите за десалинизација, со што ќе го остават целиот Блиски Исток без вода за пиење.
Ваквата топло-ладна реторика ги збунува берзите кои реагираат на секоја изјава и закана, но крајната цена зависи од состојбата на терен.
Телоп Вандана Хари „Побарувачката за нафтата може да се менува поради заканите и реториката во блиска иднина, но нејзината потрајна насока ќе продолжи да биде обликувана од состојбата на тековите на нафта на Блискиот Исток“.
Како што е познато, затворањето на Ормутскиот теснец – една од најважните артерии низ која минуваат околу 20 проценти од светските испораки на нафта и гас – речиси го блокираше глобалниот проток на енергенси. Последиците се веќе видливи: скок на цените, нестабилни пазари и растечка нервоза кај владите и индустријата. Во регионот, најкритично е во Словенија, каде поради недостиг на гориво, воведени се привремени ограничувања за купување дизел, а ограничено е и дневното точење на само 50 литри за приватни возила и 200 литри за компании и приоритетни корисници. Во Хрватска се разгледува опцијата за повторно ограничување на цените, како и продолжување на т.н. пролетен пакет мерки за поддршка на граѓаните.
Изјава Пленковиќ „Мора да го спречиме големиот скок на цените на горивата кои недвосмислено се зголемуваат со оглед на ситуацијата на пазарот. Поголемиот дел од земјите ќе одат во таа насока, па затоа мораме да внимаваме бидејќи ова ќе биде уште една енергетска криза која ќе биде посериозна од таа по почетокот на руската агресија врз Украина“
Според многумина експерти, актуелната криза со нафта е една од најлошите во поновата историја и е еднаква на комбинираната сила на двојните нафтени шокови од 1970-тите и последиците од руската инвазија на Украина.
