Последиците од војната на Блискиот Исток стигнаа во Македонија. Дизелот поскапува за 14,5 денари по литар, а бензините ќе се продаваат за 5 денари повеќе – одлучи Регулаторната комисија за енергетика. Новата цена на дизелот изнесува 85,5 денари, на 98-цата 81,50 денари, а на 95-ката 79,50 денари за литар. Екстралесното маслко за домаќинства поскапува за 12 и пол денари и од полноќ ќе се продава за 82,50 денари за литар. Се зголемува и цената на мазутот за 7 денари и сега ќе изнесува 42,586 ден/кг. Во обрзложението на Регулаторната комисија за енергетика стои дека нафтените деривати на светските берзи се зголемиле за 14% споредено со одлуката минатиот понеделник, кога бензините поскапеа за 1 денари. На берзите најмногу поскапел дизелот за над 36%, бензините се зголемиле за 13%, додека курсот на денарот во однос на доларот бил повисок за 0,94%.
Премиерот викендов рече дека ако нафтените деривати драстично поскапат, ќе следува законско намалување на акцизите и ДДВ з аколку толку да се стабилизираат цените. Евентуални одлуки во врска со цените на дериватите се очекуваат утре на владина седница. Мицкоски дополнителчно рече дека нафтените резерви се стабилни и дека се доволни за 62 дена.
Цени на нафтени деривати од 10.03.2026
ЕУРОСУПЕР 98 81,50 (ден/литар)
ЕУРОСУПЕР 95 79,50 (ден/литар)
ЕУРОДИЗЕЛ БС 85,50 (ден/литар)
Екстра лесно (ЕЛ-1) 82,50 (ден/литар)
Мазут 42,586 (ден/кг)
Економијата од друга страна подготвена за евентуален ценовен шок. Трошоците за живот продолжиле да се намалуваат во февруари. Државната статистика пресмета инфлација од 2,9%. Тоа значи дека трошоците за живот се намалени за 0,2% споредено со јануари годинава. За 0,8% биле намалени трошоците за транспорт, здравствена заштита за 0.6 %, покуќнина, опрема за домаќинствата и редовно одржување на домаќинствата за 0.5 %, а пад има и кај секторот информации и комуникации, а поевтино било и во рестораните и сместувачките капацитети.
Февруари годинава спореден со истиот месец лани, бележи пад на трошоците за транспорт од 4,4%, додека пораст има кај храната и пијалоците за 3,9%, покуќнина и опрема за домаќинствата за 4,6%, а делот за рекреација, спорт и култура поскапел за 5,4%.
Цените на мало, пак, во февруари се зголемени за 1,6% споредено со истиот месец лани. Сепак, во однос на јануари годинава, за само еден месец се намалени за 0,3%. Притоа поевтинување има кај услугите за 1,2%, како и кај прехранбено-индустриските производи за минимални 0,1%. За еден месец покачување има кај земјоделските производи за 0,7, односно пијалоците за 0,5%.
Премиерот Мицкоски претходно рече дека очекува инфлацијата да продолжи да се намалува во февруари. Сепак, предупреди дека веќе овој месец, притисоците врз цените ќе се зголемат, главно поради тензиите на Блискиот Исток. Конфликтот кој ги вклучува едни од најголемите производители и извозници на нафта во светот, удри силно врз цените на горивата и гасот на светските берзи изминатата недела. Поскапувањето на енергенсите пак, вообичаено повлекува зголемување на цената на превозот, а со тоа и на производите.
