Градоначалникот на Општина Чаир, Изет Меџити, заедно со тимот што го изработи Мастер планот за Чаир, во текот на неделата реализираше посети во неколку населби во општината, со цел следење на проектите кои веќе се во фаза на реализација, информираат од локалната самоуправа.
За време на теренските посети беа презентирани досега реализираните интервенции, како и следните фази на урбаниот развој. Меѓу клучните проекти што ја трансформираат локалната инфраструктура се работите на улицата „Ферид Мурат“ и булеварот „Мит’хат Фрашери“, каде подобрувањата во сообраќајот, пристапноста и урбаниот стандард се веќе видливи.
-Мастер планот на Чаир не е само стратешки документ, туку конкретен процес што чекор по чекор се реализира на терен, преку инвестиции што директно го подобруваат квалитетот на животот на граѓаните, истакна градоначалникот Изет Меџити.
Паралелно продолжува изградбата на општинскиот базен, инвестиција од значење за развојот на спортот, рекреацијата и младинските активности.
Стратешки сегмент претставува и проширувањето на булеварот „Цветан Димов“, проект кој има за цел зголемување на функционалноста на сообраќајот и создавање побезбедна и поефикасна сообраќајна оска за граѓаните. Во исто време, поставувањето на подземни контејнери носи современ пристап кон управувањето со отпадот и подобрување на јавната хигиена.
Теренските посети, посочуваат од Општина Чаир, послужија за проценка на динамиката на реализацијата и координација на наредните фази, со цел проектите да се реализираат согласно предвидените стандарди и рокови.
-Мастер планот на Чаир добива конкретна форма преку инвестиции што директно влијаат врз квалитетот на животот и долгорочниот развој на општината, велат од општината.
