Министерот за внатрешни работи Панче Тошковски, денеска, во Министерството прими донација од Сојузната Република Германија во вредност од речиси 600.000 евра.
– Во Министерството за внатрешни работи денеска ја примивме вредната донација од Сојузна Република Германија во присуство на амбасадорката Петра Дрекслер, со што уште еднаш се потврди силното партнерство и меѓусебната доверба меѓу нашите две земји. Станува збор за опрема во вредност од речиси 600.000 евра – моторни и специјални возила, термовизиски камери, компјутери и софтвери, уреди за проверка на документи, која директно ќе придонесе за поефикасна заштита на границите, поуспешна борба против организираниот криминал, трговијата со луѓе и шверцувањето мигранти, како и за унапредување на форензичките капацитети – соопшти Тошковски на социјалните мрежи.
Министерот Тошковски истакнал дека донацијата претставува симбол на довербата и силното партнерство меѓу двете земји.
– Оваа церемонија не е само формално примопредавање на опрема, туку јасна порака дека Германија стои рамо до рамо со Македонија во заедничката борба против организираниот криминал, во заштитата на нашите граници и во обезбедувањето на сигурноста на граѓаните. Поддршката што ја добиваме не се мери само во материјални средства, туку и во знаење, обуки и размена на искуства, што значи долгорочно зајакнување на капацитетите и професионализација на македонската полиција – нагласи Тошковски.
Тој изразил благодарност до Сојузната полиција на СР Германија и до Амбасадата на Германија во Скопје за континуираната поддршка посочувајќи дека шесте реализирани обуки за македонските полициски службеници се доказ за стратешката и долгорочна соработка меѓу двете институции.
Министерот потенцирал дека ваквата помош претставува значаен придонес во зајакнувањето на институционалните капацитети и унапредувањето на безбедноста, како и во остварувањето на заедничката визија за сигурна, стабилна и европска Македонија.
– Со обезбедувањето техничка опрема ја продолжуваме нашата долгогодишна доверлива полициска соработка. Зајакнувањето на капацитетите на Македонија во делот на граничниот надзор, во борбата против трговијата со луѓе, илегалната миграција и прекуграничниот криминал е во наш заеднички европски интерес. Заедно работиме на јакнење на Европа – денес и во иднина – истакнала амбасадорката Дрекслер.
Министерот во објавата посочува дека уште поважна од опремата е пораката што ја носи оваа поддршка, дека Германија стои рамо до рамо со Македонија во обезбедувањето сигурност и стабилност за нашите граѓани.
– Преку заедничките обуки и размената на искуства градиме модерна, професионална и европска полиција. Искрена благодарност до Сојузната полиција на Германија и до Амбасадата на Германија за континуираната поддршка. Продолжуваме заедно да ја јакнеме безбедноста и институциите на нашата држава – посочува Тошковски.
Видеото може да го погледнете на следниот линк:
