Нема застој во исплатата на породилното отсуство – тврди првиот човек на Фондот за здравство. По жалбите од неколку мајки дека надоместокот за породилно отсуство доцни по 30 дена, Клековски демантира и уверува дека парите се исплаќаат континуирано, а причината за евентуалните задоцнувања, не се до фондот туку до работодавачите кои доцнат со пријавите или со исплатата на плати. Од Фондот информираат дека најголемиот дел од парите се исплаќаат од 10 до 20 секој месец, а процесот продолжува до крајот на месецот. За ноември веќе се исплатени над 6.600 породилни отсуства.
Во однос на дефицитот на тумор-маркери на Клиниката за онкологија – проблем кој трае со месеци – Клековски смирува дека нема простор за паника кај пациентите. Појасни дека овие испитувања може да се прават и на други клиники и во здравствените домови ширум државата.
На брифингот со новинарите, директорот Клековски потенцираше дека Фондот за здравствено осигурување ги исплаќа навремено капитациите на матичните доктори во предвидениот рок од 60 дена и дека нема никакво задоцнување. Исплатата за ноември, во износ од 493 милиони денари, е во тек, а зголемувањето од 33% на капитациите е целосно реализирано.
